Actualités

Partagé sur :
• facebook

Efa fantatra ny momba ireo FAT telo izay voasaringotra amin’ny raharaha “bois de rose”. Efa nanome baiko ny ministry ny tontolo iainana ihany koa ny filohan’ny tetezamita ny amin’ny hisamborana avy hatrany ireo tompon’andraikitra amin’ny fanondranana, na iza izy na iza.

Novaina ho kaomisiona avy hatrany ny «task force» izay noravaina rehefa fantatra fa nisy olona tao anatiny ihany koa voarohirohy ao anatin’ny raharaha. Notatatataina tamin’ny haino aman-jery mpivoy ny hevitry ny FAT ihany koa ny momba ireo olona voarohirohy na dia tsy notononina aza ny anarany. Ankehitriny dia efa saika fantatry ny mpanara-baovao ny momba ireo olona ireo saingy samy miandry ny fivoaran’ny raharaham-pirenena ny tsirairay mba hamoahana izany. Ary ny tena loza dia saika ireo olona mpanampatra fahefana sy tsy refesi-mandidy eo anivon’ny FAT ireo voarohirohy ireo.

Ny iray aza dia anisan’ny nanampy betsaka tamin’ny fampiasana mersenera mba handrodanana ny fitondrana teo aloha. Ny faharoa kosa dia manamboninahitra iray efa nogadrain’ny fitondrana teo aloha ka anisan’ny navoakan’ny fitondrana tetezamita. Ny fahatelo indray dia vao haingana no tafiditra tamin’ny famoahana voafonja izay nahafaty olona kanefa dia mbola miriaria fatratra any. Ireo hatreto no tena tompon’andraikitra voalohany. Manodidina azy ireo ny manamboninahitra miaramila sy zandary izay efa fantatra ihany koa miaraka amin’ireo mpiasan’ny fadin-tseranana sy polisy samihafa izay tafiditra ao anaty tambajotra avokoa. Ny andrasan’ny maro dia ny hoe tena sahy ny hisambotra azy ireo tokoa ve ny FAT ? Hatramin’ny omaly aloha, raha araka ny fahafantarana azy, dia tsy mbola nisy na ny didy fampisamborana na koa fepetra hafa noraisina momba azy ireo, toy ny hoe tsy famelana ireo olona ireo ny hivoaka ny tanindrazana. Toa efa midika sahady izany fa tena tsy refesi-mandidy tokoa ary tsy maty manota ireo olona ireo. Andrasana ihany koa ny fandraisana andraikitr’ireo fikambanana mpiaro ny tontolo iainana, na ny fiarahamonim-pirenena, indrindra ny ankolafy telo izay efa nanambara fa izy ireo no hilaza ampahibemaso ireo olona voarohirohy rehetra rehefa tsy handray andraikitra ny FAT. Andrasana avokoa izany rehetra izany ato ho ato... 

Tia Tanindrazana

Samia mijoro ho an'i Gasikara.