Actualités

Partagé sur :
• facebook

Napetraka tamim-pomba ofisialy omaly ny vato fototry ny fanombohana ny asa fananganana ny tsena ao Bazary kely Toamasina, ahitana box miisa 131.

Ny orinasa Sariaka  no nahazo ny tolo-bidy. Tamin ' ny alalan' ny fiaraha-miasan’ny fanjakana sy ny sehatra tsy miankina no hahafahana manatanteraka ny asa. Tonga nametraka izany ny Ben’ny tanànan’ny kaominina ambonivohitr’i Toamasina Elysé Ratsiraka notronin'ireo solontenam-panjakana isan-tsokajiny. Nambaran' ny Ben' ny  tanàna fa natsangana ny fotodrafitrasa entina  hanalana fahasahiranana ny mpivarotra izay mitombo isa hatrany sy hanampiana ireo mpampiasa lalana. Lasa  toeram-pivarotana mantsy ny arabe fivezivezen' ny fiara. Ezahina hovitaina ao anatin’ny efa-bolana ny asa raha enim-bolana no fe-potoana ara-dalàna hananganana ity Bazary kely ity. Hanorina trano be dia be ao Toamasina ihany koa ny kaominina. Hampitomboina ny isan' ny tranobe mitovy amin’ireo efa mitsangana ao Bazary be. Ny ao  Ankirihiry sy Ambolomadinika hatreto no ho lohalarahana.  Ankoatra izay,  hamaha ny olana goavana momba ny rano fisotro madio ihany koa  ny kaominina ambonivohitr' i Toamasina. Hisy ny fananganana trano fidiovana, toerana fanasan-damba, ny paompin-drano fisotro madio. Efa hitan’ny mpamatsy vola ireo rehetra ireo ka ao Tsarakofafa  no hanombohana azy. Hanangana kianja filalaovana ho an’ireo manana fahasembanana ihany koa ny kaominina ary hapetraka ny toerana fiandrasana taksibe marobe.

Pati

Tia Tanindrazana

Samia mijoro ho an'i Gasikara.