Actualités

Atsinanana sy Analanjirofo Mpampianatra SEMPAMA 45 no efa tapaka karama

Actualités
Zoma 31 Aogositra 2012

Nampiantso ny mpanao gazety tao Ambolomadinika ny SEMPAMA Atsinanana sy Analanjirofo ny alarobia tolakandro teo, nilazan�izy ireo ny tatitra azony sy niainan�ny naman�izy ireo nandritra iny fanadinana BEPC farany teo iny.

Amin’izy ireo dia “tsy nisy fanadinam-panjakana peta-toko tahaka iny fanadinana teo iny teto amintsika hatramin’izay. Faly hahazo taha ambony fotsiny ny minisiteran’ny fanabeazam-pirenena dia ny hoavin’ny tanora Malagasy no simbaina”. Nomarihan’izy ireo fa “na ho inona no ambara eto, dia voamarina ny fisian’ny fandikana ny valiny nomena ny mpiadina, indrindra ny tamin’ny matematika sy fizika ary ny siansa momba ny olombelona sy ny tany”. Efa nisy fitoriana nataon’izy ireo teo anivon’ny Bianco Toamasina ny mahakasika izany, ankoatra ny napetraka ao amin’ny fampanoavana Toamasina, mba ny hijerena sy hanaovana fanamarinana mikasika ity olana goavana ity. Voamarin’ireo mpampianatra nitsara ny fanadinana mantsy fa ny 2/3-n’ny kopia notsaraina dia ahitana fitoviana na tena mitovy avokoa, teo koa ireo olona ivelan’ny fampianarana toy ny filoham-pokontany sy ny kartie mobila ary ny olon-tsotra nanao ny fiambenana.

“Tsy manaiky ny famoahana ny valin’ny fanadinana BEPC izahay, raha tsy efa vita ny fanamarinana rehetra ataon’ny fitsarana sy ny Bianco ary ny manampahefana mifandraika amin’izany”, hoy hatrany ireto SEMPAMA Ireto. Hiatrika fihaonambe eto Antananarivo ny SEMPAMA ny 05 septambra izao, handinika ny fanohizana ny tolona manaraka ary ny mikasika ny taom-pianarana 2012 – 2013. Ankoatra izay, dia nambara tamin’io fihaonana io fa mpampianatra SEMPAMA miisa 45 ahitana 14 amin’ny DREN Atsinanana ny ambiny ao amin’ny DREN Analanjirofo, no efa tapaka karama ankehitriny. Mpampianatra eo anivon’ny SEMPAMA 6 tao Mahanoro koa no tsy navela nitsara fanadinana na nahazo fiantsoana ara-dalàna aza.

Nifanohana tamin’izao resaka natao tamin’ny mpanao gazety izao, ny SG SEMPAMA Toamasina Randrianarisoa Jeanne, ireo SG lefitra Zafitody Sylvie sy Rosaka Raymond, SG SEMPAMA Analanjirofo Randrianirina Séraphin, ary ireo mpikambana sasany ao anatin’ny birao SEMPAMA Atsinanana sy Analanjirofo.

Rakoutou