Actualités

Antsiranana Mamofompofona OPK

Actualités
Alatsinainy 23 Aogositra 2010

Nisesy ny fanafihana tranombarotra karana tao Antsiranana tao tato ho ato. Saika ny mpivarotra volamena hatrany anefa no lasibatra. Araka ny fantatra, dia efatra amin’izy ireo izao no nisy namaky hatramin’ny fiandohan’ny taona, ary fanafihana mitam-basy avokoa izy ireo. Mamofompofona OPK tamin’ny 1991 ny raharaha. Manahy noho izany ny fianakaviambe karana ao Antsiranana. Nifamory maika izy ireo ny faran’ny herinandro teo. Nisy ny fepetra noraisina taorian’izay. Fa dia vonona ny hamoaka vola izy ireo amin’ny fanamafisana ny fiambenana. Nosantarina amin’ny fiambenana eny amin’ny Mosquée izany, mandritra ny fotoanan’ny vavaka. Polisy enina no manatanteraka ny fiambenana amin’izany.

Samy mandray andraikitra amin’ny fanamafisana ny toeram-pivarotany avy ny hafa. Misesisesy ny fanafihana mitam-basy tao Antsiranana tao ho ao izay. Kalachnikov, izay basy tsy tokony ho eny an-tanan’ny sivily, mihitsy no entin’ny mpamaky trano. Tsy ny Karana ihany fa ny mponina ao Antsiranana amin’ny ankapobeny mihitsy no mihorohoro eo anatrehan’izany.

Jean D.