Actualités

Partagé sur :
• facebook

Natao ihany ny tsy hiteny saingy efa tena mampiteny ny moana ny fako ao Antsirabe amin’izao fotoana, indrindra fa taorian’ny fetin’ny faran’ny taona lasa iny.

 Raha atao indray mijery dia toa izay talaky maso sy lalovan’ny maro ihany no enjehina diovina fa ny any ambadibadika any dia teny tsy misy mijery mihitsy. Ho an’izay mampiasa ny zotram-pitaterana laharana faha-12 angamba dia mahita tsara ny fitobaky ny fako eo andamosin’ny sekoly Masimbavy Terezy, izay feno hipoka hatramin’ny lakandrano eo amin’ny sisin-dalana. Raha ny filazan’ny mponina moa dia misy ihany ny fiara be mba maka fako eo saingy indray mandeha isan’andro izy no manao izany fa tsy maha afaka akory ireo fako eo izay efa betsaka, kanefa mitohy ihany ny fanariana ataon’ny mponina.

Efa nanao fanamby moa ny PDS tamin’ny fotoana nahatongavan’i Andry Rajoelina tao Antsirabe fa aorian’ny fanampiany ny Kaominina dia ho 200% ny fanadiovana ny tanàna, ary nolazainy nandritra ny tafa nifanaovany tamin’ny mpanao gazety ihany koa fa vitan’ny Kaominina amin’ny alalan’ilay “fonds libre”, 191 tapitrisa Ariary ny asa maika sy mila enjehina, kanefa raha ny zava-misy dia hatramin’ny karaman’ny mpiasan’ny Kaominina aza saika tsy voaloa ny faran’ny taona teo. Hatramin’izao koa aza tsy mbola hita na tazana akory ilay fiarabe nampanatenain’ny filohan’ny tetezamita ny talata 16 oktobra 2012, ho an’Antsirabe nambara fa hanamaivanana ny fanariana fako ka soloina goavana kokoa no sady hampiana iray hafa saingy : “Nanjavona hoa!”, hoy ny hira e!

Caïus Raharison

Tia Tanindrazana

Samia mijoro ho an'i Gasikara.