Actualités

Antanimena Nahitana baomba indray

Actualités
Zoma 19 Novambra 2010

Tokony ho tamin’ny folo ora maraina omaly no nahitana ity baomba vita gasy tao amin’ny Immeuble Santa, Antanimena. Teo akaikin’ny trano fisakafoanana no nahitana an’izany. Nisahotaka ny olona ary samy namonjy ny ainy. Ny mpitandro ny filaminana rahateo tsy namela ny olona hanakaiky ilay toerana mandra-pialan’ilay baomba teo. Voafehy ihany ny loza, fotoana fohy avy eo rehefa tonga teo ny miaramila manampahaizana amin’izany. Notapahina ny lalana ary nitohana ny fifamoivoizana vokatr’izany. Raha tsiahivina dia fanintelony izay no nisy baomba hita tao anatin’ny andro vitsivitsy monja. Afak’omaly, ohatra, dia nisy karazana baomba nirefotra teo anoloan’ny lapan’ny kolontsaina sy ny fanatanjahantena. Ny alahady teo koa dia nisy nitoraka tamin’ny baomba ny fivarotan-dasantsy iray tetsy Tsiazotafo. Ity tetsy Antanimena omaly ity no fanintelony. Toa lasa miverimberina ny fametrahana baomba izay ny ankamaroany dia tsy mipoaka fa entina mampatahotra fotsiny. Tsiahivina fa efa maro ny mpanao politika no nosamborina sy notazomina am-ponja noho ireny baomba tsy mipoaka sy tsy fanta-piaviana ireny. Tsy manam-pitsaharana anefa izy ity. Iza ihany ary no tena tompon’andraikitra ?