Actualités

Ankatoky ny fety 3.500 ireo ankizy notoloran’ny vadin’ny filoha fanomezana

Actualités
Talata 12 Desambra 2017

Ankizy marary sy sahirana ara-pivelomana miisa 230 isa omaly, no notoloran-drtoa Voahangy Rajaonarimampianina, vadin’ny filoham-pirenena, fanomezana, amin’izao ankatoky ny fetin’ny Noely sy ny faran’ny taona izao.

Anisan’ireny ireo zaza tsy salama miisa 55 manaraka fitsaboana eo anivon’ny hopitalin’ny reny sy ny zaza etsy Tsaralalàna. Toraka izany koa ireo 66 isa tazonina etsy amin’ny hopitalin’ny reny sy ny zaza etsy Ambohimiandra ary ireo 125 mianadahy zanak’olona sahirana ara-pivelomana tezaina sy beazina eo anivon’ny ivontoerana “Graine de bitumen” etsy Ambanidia. Kilalao, menaka, savony, ronono, vary… no natolotra azy ireo. Tonga nisolotena ny vadin’ny filoha nanatitra ny fanomezana, ny vadin’ny Minisitry ny indostria, Rtoa Tazafy Brigitte. Nambaran’ity farany fa ny mba hanamaivanana ny fahasahiranan’ny isan-tokantrano amin’ny fiatrehana ny fety no tanjona, sady hamalifaliana ireo ankizy madinika ihany koa. Efa tafakatra 3.500 hatreto ny isan’ireo ankizy madinika notoloran’ny vadin’ny filoha fanomezana. Tafiditra ao anatin’izany ireo ankizy manana fahasembanana beazina eny anivon’ireo ivontoerana maro samihafa, toy ny AKAMA etsy 67 ha, ny Orchidée Blanche etsy Androhibe…

Pati