Actualités

Ambatondrazaka Mitevy vary maitso ny tantsaha

Actualités
Alatsinainy 17 Mey 2010

Voatery didiana mbola maitso ny vary any Alaotra amin’izao fotoana izao noho ny tsy fandriampahalemana mahazo laka any an-toerana. Etsy an-daniny dia mitaraina ny tantsaha fa tsy mitsahatra mitotongana ny vidim-bokatra ary manararaotra izay tsy izy ny mpanangom-bokatra. Tao anatin’ny herinandro fotsiny dia nihena ho 4000Ar ny iray vata amin’ny vary akotry raha toa ka 5000 izany teo aloha. Ny volan’ireo sehatra fampindramam-bola madinika toy ny CECAM sy OTIV anefa tsy maintsy averina, izy ireo rahateo mandodona mafy ny amin’izany. Tsy manan-tsafidy ny tantsaha ka voatery mivaro-mora ny variny. Eo anelanelan’ny 350Ar ka hatramin’ny 400Ar ny kilaon’ny akotry. Tamin’ny dinidinika nifanaovan’ny mpanao gazety any Ambatondrazaka tamin’ny tantsaha no nahalalana fa nanodidina ny 220.000 taonina ny voka-bary niala tany Alaotra tamin’ny taom-pamokarana 2009. Ny mahagaga, hoy izy ireo dia ny 120.000 taonina tamin’ireo ihany no nandalo fandanjana. Mametra-panontaniana ny tantsaha, fa nankaiza ny 100.000 taonina ambiny ? Nahatratra 546 ny isan’ny mpanangom-bokatra nahazo alalana tamin’ny taon-dasa, raha 1200 kosa ny fangatahana hitondra vary hivoaka an’Alaotra Mangoro.

Nangonin’i Jean D.