Actualités

Ambatondrazaka Miaro tena ireo mpanolotsain’ny tanàna

Actualités
Zoma 29 Desambra 2017

Hentitra ireo mpanolotsaina ao amin'ny kaominina ambonivohitra Ambatondrazaka raha nitafa tamin'ny mpanao gazety mahakasika ny tsikera mahazo azy ireo.

Nambaran’izy ireo fa manara-dalàna avokoa ny fanapahan-kevitra noraisina momba ny fanatsarana ny tanànan’Ambatondrazaka. Anisany ny fanorenana tsena vaovao ao amin'ny tokotany malalaky ny Stand Central. Nisy ny tolo-barotra natao ka izay sahy dia nifanaraka avy hatrany tamin'ny kaominina. Misy indray ireo tsy nahavita nikarakara ny taniny ho ara-dalàna ka nampirisihina hikarakara izany. Vokany, nitombo ny vola niditra ao amin'ny kitapom-bolan’ny kaominina Ambatondrazaka. Mahakasika ny fampiasana olon-tsotra ny zaridaina ao Antsahatanteraka dia nanamarika ireo mpanolotsaina fa tapitra amin'ny faran’ity taona ity ny fampiasana azy. Efa mizotra ny asa fampandrosoana ny kaominina Ambatondrazaka, hoy i Tonton Manga izay mpitondratenin’ny mpanolotsaina.

Niry A.