Actualités

Partagé sur :
• facebook

Hitodika etsy amin'ny fitsarana Anosy ny mason'ny rehetra rahampitso talata 25 jolay.

Raharaha 2 be mpanaraka eto amin'ny firenena mantsy no hivoaka dia ny momba ny filohan'ny Antoko Masters Alain Ramaroson sy ny mahakasika ny filohan'ny Fikambanana Hafari Malagasy Jean Nirina Rafanomezantsoa. Tsiahivina fa efa nanomboka ny 3 aogositra 2016 no nigadra teny Antanimora i Alain Ramaroson noho ny resaka ady tany hifanolanany amin'ny fianakaviany. Ny herinandro lasa teo izy no niverina niakatra fitsarana, ka nandritra izany no mbola nitakian'ny mpitory azy onitra 2 miliara ariary ho sandan'ny resaka hosoka nataony tamin'io raharahan-tany io. Mandeha ihany koa anefa ny resaka fa tsindry politika mihitsy no handetehana azy, ka tsy hay na ho afaka ny tenany na hanohy ny figadrana. Mikasika an'i Jean Nirina Rafanomezantsoa kosa dia efa ela ihany koa ny tenany no notazonina am-ponja noho ny raharaham-pitoriana maro. Ny 11 novambra 2016 no nisy didim-pitsarana azy voalohany ka nanamelohana azy higadra herintaona an-tranomaizina. Nisy ihany koa ny sazy mihatra 6 volana nivoaka ny 28 febroary lasa teo noho ny resaka herisetra sy fampihorohoroana, araka ny voalazan'ny fitoriana. Nahazoany fahafahana vonjimaika kosa ny momba ilay hoe fitazonana an-keriny sy fanolanana. Toa nanao tohivakana ny fanenjehana sy fandetehana azy, ka tsy hay indray izay haloaky ny fitsarana rahampitso.

Toky R

Tia Tanindrazana

Samia mijoro ho an'i Gasikara.