Toekarena

Vondron’ny vehivavy mpandraharaha Nanome fiofanana tany amin’ny faritra

Toekarena
Alatsinainy 06 Mey 2019

Mitohy hatrany ny ezaka ataon’ny Vondron’ny vehivavy mpandraharaha na ny “Groupement des femmes entrepreneurs” tarihin-dRazakaboana Fanja,

hanampiana ireo vehivavy mpandraharaha eto amintsika mba ho matihanina amin’ny asa hatrehiny ka ho afaka hanondrana ny vokatra vokariny mankany ivelany. Vehivavy mpandraharaha am-polony tany amin’ny Faritra Matsiatra ambony, Toamasina ary DIANA indray no nomen’izy ireo fiofanana momba ny lalam-pihariana vary sy ny fanodinana voankazo ny herinandro lasa teo taorian’Antananarivo. Ny vondrona Eoropeanina amin’ny alalan’ilay tetikasa Procom, raha tsiahivina, no mamatsy vola. Ny tanjona dia ny hamoahana vehivavy mpandraharaha Malagasy miisa 35 mahafehy tsara ny paikam-barotra ataony aorian’ny fiofanana hatrehin’izy ireo. Nambaran-dRajaonarison Julie, sekretera mpanatanteraka eo anivon’ny GFEM tamin’izany fa hahazo tohana ara-bolana manokana izay vehivavy mpandraharaha mendrika indrindra hahafahany manatsara ny asa fihariany. Ny 19 mey ho avy izao moa no hikatona tanteraka ity fanofanana vehivavy mpandraharaha ity ka aorian’izay dia hirotsaka an-tsehatra hanara-maso ireo mpahazo tombontsoa ny mpamatsy vola mba tena hisy vokany amin’ny toekarem-pirenentsika izany ary hahazo vahana any amin’ny sehatra iraisam-pirenena ihany koa.

Pati