Toekarena

Vola vaovao 20 000 Ariary Manahirana ny fampiasana azy

Toekarena
Talata 18 Jolay 2017

Nikirakira vola vaovao indray ny Malagasy nanomboka omaly. Nivoaka ary nampiasaina manerana ny Nosy nanomboka omaly mantsy ireo ravim-bola vaovao amin’ny endriny hafa toy ny 2.000 Ar, ny 5.000 Ar, ny 10.000 Ar ary ny 20.000 Ar mitambatra.

Mampiavaka ireto vola taratasy vaovao ireto raha araka ny fantatra ny singa fiarovana tsara kalitao ho fisorohana ny hosoka sy ny fanaovana vola sandoka. Toraka izany koa ireo karazana sary maneho haren’i Madagasikara manerana ireo faritra enina mandrafitra ny endrik’izy ireo. Na izany aza dia tsy hankasitrahan’ny rehetra loatra ny fisian’izy ireo amin’ny ankapobeny, indrindra fa ilay 20.000 Ar mitambatra. Ho an’ny mpitatitra mantsy dia tena hanahirana azy ireo tokony ny haka 400 Ar amin’ny lela-vola 20.000 Ar alohan’ny mpandeha raha vao mainka hanome vahana ny mpanendaka sy ny mpanao afera ny fisian’izy ireny ho an’ny olon-tsotra. Santionany amin’izany ireto sendra ny gazety Tia tanindrazana ireto.

Ramatoa Sarobidy, Renim-pianakaviana niteraka roa : Ho anay tantsaha aloha tena tsy mety ilay 20.000 Ar mitambatra e ! 100 Ar sy 200 Ar ange no alaina amin’io lela-vola io mba hividianana kafé sy siramamy ary savony kely satria izay no mba takatray e! Raha betsaka indrindra tsy mihoatra ny 5.000 Ar ny vola lanianay ao an-tokantrano isan’andro.

Ramatoa Miangaly, mbola mpianatra : Mbola tsy zakan’ny saintsika Malagasy ny fampiasana io lela-vola 20.000 Ar amin’ny ankapobeny. Efa renivola mihitsy mantsy no vakiana amin’izany rehefa hanakalo azy isika. Ankoatra izay mety hiteraka olana goavana eo amin’ny mpivarotra sy ny mpitatitra ny fanakalozana azy io an ! Ny mamerina ny 5.000 Ar aza amin’izao efa tena manahirana.

Pati