Toekarena

Vinavinan’ny FMI Miiba ny fitomboana ara-toekaren’i Madagasikara

Toekarena
Alarobia 28 Oktobra 2020

“Mampanahy ihany ny hoavin’ny toekarena sy ny fampandrosoana eto Madagasikara. Mety ho sarotra rahateo ny fanarenana ny toekarena aty amin’ny tapan’Atsimon’i Afrika, ary voakasika manokana amin’izany ny eto Madagasikara” hoy Abebe Aemro Selassie,

Talen'ny Tahirim-bola iraisam-pirenena (FMI) aty Afrika. Nanamafy ny efa nambarany enim-bolana lasa izay izy. “Tsy hisy Firenena Afrikanina ho afa-maina amin'ny krizy ara-pahasalamana sy ara-toekarena”. Hitotongana tanteraka ny toekaren'i Madagasikara amin'ity taona 2020 ity, ary mety ho isa miiba hatramin’ny -3,2% ny fitomboan’ny (fitotongan'ny) harin-karena faobe, araka ny fanitsiana (chiffre révisé) nataon’ny FMI, raha toa ka notombanan’ny Governemanta ho isa miabo +0,8% izany tany amboalohany. Anisan’ireo heverina mahatonga izao fitotonganana izao ny fanidiana ny sisin-tany, ny fahabangan’ny vola azo avy amin’ny fanondranana ary ny tsy fisian'ireo mpizahatany mitsidika an'i Madagasikara. Tsy ho mora ny fanarenana izany, ary mety haharitra an-taonany maro .Tsy maintsy hisy fiantraikany amin’ny faripiainan’ny mponina izany rehetra izany.

Marigny A.