Toekarena

Varotra elektronika Maro no voafitaka

Toekarena
Sabotsy 24 Febroary 2018

Taorian’ny fampiofanana nomena ireo mpisehatra rehetra miisa 60 afaka handavorary ny tontolon’ny lalàna sy ny fampandehanana ny varotra elektronika na ireny varotra ifanakalozana amin’ny aterineto itony ny 19 ka hatramin’ny 22 febroary teo dia nampahafantarina omaly tetsy amin’ny tranoben’ny varotra etsy Antaninarenina omaly ny fehezan-dalàna tsara ho fantatra momba izany.

Nampahafantarina ihany koa ny toeran’i Madagasikara mikasika izay eo amin’ny sehatra iraisampirenena sy ireo lesoka mila arenina ary tanjona tokony ho tratrarina. Mbola mila hamafisina, hoy ny fanazavana, ny fiarovana ireo mpanjifa amin’izy ireny eto amintsika satria maro ireo mora fitahana. Efa mipetraka ny lalàna fa anjarantsika no mamoaka ny didy fahafaha-mampihatra azy. Olana ny tsy mbola fahafahan’ny malagasy mampiasa aterineto ary tsy afaka mamoaka tarehimarika mazava mikasika izany hatreto. Ny varotra amin’ny facebook koa mbola mampametra-panontaniana hoe mandoa hetra ara-dalàna sa tsia, hoy hatrany ny fanazavana.

J. Mirija