Toekarena

Vahinala Raharinirina « Tsy hisy fandrosoana raha tsy manome hasina ny any amin'ny fototra »

Toekarena
Zoma 14 Febroary 2020

Namory ireo talem-paritry ny Tontolo iainana sy Fandrosoana Lovain-jafy Rtoa minisitra Baomiavotse Vahinala Raharinirina, omaly maraina,

tao amin’ny biraony etsy Antsahavola. Fihaonana voalohany namelabelarany ny hitondrany ny ministera araka ny vinan'ny filoha, no koa nihainoany ireo hetahetan'ny rantsamangaikan'ny ministera. Aminy dia « tsy hisy fandrosoana raha tsy manome hasina ny any amin'ny fototra ». Raha nanontaniana momba ny resaka sokatra tratra tany Ampanihy ny minisitra dia nilaza mazava izy fa « nanameloka ny fanondranana ireo sokatra izay anatin’ny karazam-biby ho lany tamingana ao anaty lalàna CITES » no nidera ireo tompon'andraikitra any amin'ny faritra tamin’ny fisamborana ireo mpanao tantely afa-drakotra ny harem-pirenena, "satria manatratra hatrany ny tanjona napetraky ny filoha anaty velirano faha-10 ny fitantanana maharitra ny harena voajanaharintsika", hoy ihany Rtoa minisitra. Nanamarika ny minisitra Baomiavotse Vahinala Raharinirina fa efa mandeha amin’izao fotoana izao ny fanomezam-bahaolana ho an'ireo olona eny ifotony noana ka mihinana ireny sokatra ireny. Misy ny tetikasa iarahana amin’ny ministera hafa sy ny mpiara-miombon’antoka ary ny sampandraharaha misahana ny tontolo iainana sy fandrosoana Lovain-jafy eny anivon’ny faritra rehetra, ahafahana manatanteraka izany. Betsaka tokoa ireo harena mampiavaka an’i Madagasikara ka mila miasa miaraka isika mba hitandrovana azy ireny.