Toekarena

Tsena Pochard Mpanao asa tanana 75 mianadahy nosalorana medaly

Toekarena
Sabotsy 20 Janoary 2018

Maherin’ny roa tapitrisa amin’ny Malagasy no mivelona amin’ny asa tanana. Mitondra vokatra ho amin’ny fampandrosoana ara-toekarena eto Madagasikara izy ireo satria manome 15 % hatramin’ny 17 % amin’ny harinkarena faobe. Nihatsara ny tsena tamin’iny taona 2017 iny raha oharina ny taona 2016,

hoy ny Filohan’ny Fikambanana Arts–Malagasy Miray (AMM) Rakotoarivony Aimé. Na dia izany aza, maro ny olana sedrain’izy ireo toy ny fihenan’ny akora fototra ilaina, ny tsy fahampiana eto an- toerana noho ny fanondranana ka zary tompony mangataka atiny ny mpanao asa tanana Malagasy. Mitaky fepetra mazava sy fanaraha-maso matotra ny amin’ny fitrandrahana sy ny fanondranana ny akora fototra toy ny hazo, tandroka, rofia, hoditra izahay, hoy ihany izy ary tsy matahotra ny hifaninana amin’ny firenena hafa. Tetsy an-daniny, ny minisitry ny kolontsaina, fampiroboroboana ny asa tanana ary ny fiarovana ny vakoka Jean Jacques Rabenirina dia nilaza fa andraikitra voalohany tokony horaisin`ny mpanao asa tanana ny fidirana amin`ny sehatra ara-dalàna sy matihanina. Manaraka izany tokony hohamafisina, hoy izy ny fahaiza-manao ary ampiarahina amin’ny fihazakazahan’ny fandrosoana. Samy niaiky ny roa tonta fa mbola maro ny ezaka tsy maintsy atao hampandroso ny asa tanana eto amintsika.

Tsiry