Toekarena

TSENA B –Village Voara Manasongadina ny vita Malagasy

Toekarena
Sabotsy 09 Desambra 2017

Nosokafana omaly tamim-pomba ofisialy tetsy amin’ny Village Voara Andohatapenaka, ary haharitra telo andro, ilay hetsika tsena B karakarain’ny Infinity Group sy ny First evenementiel.

Tranoheva manodidina ny 350 isa no mandray anjara, ahitana ireo kojakoja rehetra ilaina amin’ny fiainana andavanandro sy mandritra ny fetin’ny Noely sy ny faran’ny taona , toy ny akanjo, ny kiraro, ny pôketra, ny kilalao ho an’ny ankizy, ny sakafo, ny kojakojan-dakozia… Mampiavaka ity hetsika ity, araka ny fanazavan-dRtoa Mariah Andria, ny fandraisan’olona izay tena amim-pitsikitsikiana tokoa. Ezahina tsy hisy mpilahatra eo amin’ny vavahady fidirana, hoy izy, ankoatra ny fihenam-bidy omena ny mpanjifa. Manodidina ny 25.000 isa ireo mpitsidika andrasana amin’izany, ka ho an’ireo tia sy mankafy ireo karazana vokatra sy asa tanana vita Malagasy dia betsaka ihany koa ireo mpandraharaha avy amin’ny faritra 22 no tonga mandray anjara sy mampiranty ny vokatra vokariny eny an-toerana. Tsiahivina fa misy ny fiara navety mitondra ireo mpitsidika, miainga eny amin’ny INSTAT Anosy hatreny Andohatapenaka, isan’andro, ary saran-dalana tokana ihany no aloa. 2.000 Ar kosa ny vidim-pidirana. Marihina fa hisy ny trophée hatolotra ireo tranoheva mendrika indrindra, mpandray anjara mendrika… rahampitso alahady.

Pati