Toekarena

Tiko AAA Mpiasa 702 nalefa “chômage technique”

Toekarena
Zoma 23 Martsa 2018

Tsy namelan`ny fanjakana raha tsy rava tanteraka ny orinasa Tiko AAA. Vokatry ny fahirano nataony dia voatery nanao fiatoana ara-teknika ity orinasa ity. Manomboka androany alakamisy 22 martsa 2018(ndlr:omaly) dia manao fanambarana ofisialy izahay mpisolovava an`ny orinasa AAA fa tsy maintsy hizotra any amin`ny fiatoana teknika ny orinasa, hoy Ratefimahefamijoro Dimin`Eloi.

Voasazy daholo ireo mpiasa 702 amin`ny 850 miampy ireo mpamatsy sy tantaha mpamokatra miisa 4000 ary ireo mpivarotra maherin`ny 10 000. Araka ny lalàna mifehy ny asa dia enim-bolana ihany ny fetran’ny “chômage technique” ara-dalàna ary ao anatin`izay no hikarohana vahaolana. Nanambara hatrany ity mpisolovava ity fa ny antony nanakatonana ny orinasa dia ny tsy fananana “Permis environnemental” sy “permis d`exploitation” izay efa nangatahana. Ireo dia efa nanaovana fangatahana ara-dalàna tamin`ny oktobra 2017 kanefa tsy mety namoaka ny fanjakana hatramin`izao. Tao anatin`ny dimy volana dia maro ny antsojay natao tamin`ity orinasa ary izao tonga tamin`ny tanjona niriany. Marihana fa misy orinasa mitovy tranga an`ity orinasa ity nefa mahazo mamokatra sy mihodina. Iza no mahazo tombony amin`izao fandravana orinasa izao ? Aiza ho aiza ny fandraisan’andraikitra raisin`ny minisitera mpiahy ? Potika tanteraka, araka izany, ny orinasa Malagasy ary dia mitazam-potsiny ny fanjakana Malagasy. Hita taratra kosa fa misy tetika politika lalina ao anatin’izao raharaha izao.

Marigny A.