Toekarena

Tetikasa « mpianatra iray, hazo iray » Hazo 4.500.000 mahery no kasaina hambolena

Toekarena
Alatsinainy 02 Novambra 2020

Natomboka ny fiaraha-miasa amin'ny Fitaleavam-paritry ny Fanabeazam-pirenena manerana ny Nosy hanatanterahana ny tetikasan’ny minisiteran’ny tontolo iainana sy ny fampandrosoana maharitra, mpianatra iray, hazo iray,

raha ny fampahafantarana natao ny faran’ny herinandro teo. Ireo mpianatra ireo ihany no hikolokolo mandava-taona ny zanakazo novoleny. Ampivadiana amin'ny taranja fanabeazana ara-tontolo iainana izay hianaran'izy ireo any am-pianarana izany, hoy hatrany ny fanazavana. Ho atao mandava-taona fa tsy indray isan-taona ihany koa ny fambolen-kazo. Adidy iombonan'ny olompirenena rehetra koa io. Raha tanteraka ny kinasa amin'ny Sekolim-bahoaka rehetra dia hazo maherin'ny 4.500.000 isa no ho voavolin'ny sehatra fanabeazam-pirenena, hoy hatrany ny fampitam-baovao. Miisa 17.000 moa ireo mpianatra ao amin’ny faritra Atsinanana nanao ny adidiny tamin’ity herinandro ity, raha ny fampahafantarana natao hatrany.

J. Mirija