Toekarena

Partagé sur :
• facebook

Fanaovan-tsonia fiaraha-miasa roa sosona no notanterahana omaly teo anivon'ny programa nasionaly Fihariana. Anisan’izany ny niarahana tamin’ny minisiteran'ny fambolena,

 ny fiompiana ary ny jono mikasika ny fampiroboroboana ny tetikasa « akohonakà » izay tafiditra anatin'ny ady amin’ny tsy fanjarin-tsakafo sy fampirisihina ny Malagasy hihinana sakafo mitondra otrikaina. Eo ihany koa ny fifanarahana tamin’ny minisiteran'ny Indostria, ny varotra ary ny asa tanana mahakasika ny fametrahana biraon'ny Fihariana any amin’ireo antenimieran'ny varotra sy ny indostria miisa 23 manerana an'i Madagasikara sy ny fanombohana ny atrikasa ifampizarana (atelier partagé). Natao ity farany mba  ho fanampiana ireo mpandraharaha madinika amin'ny famoronana asa sy fananganana orinasa. Nanambara ny minisitry ny indostria, Lantosoa Rakotomalala fa na aiza na aiza faritra eto Madagasikara dia afaka misoratra anarana eny amin’ny antenimieran’ny indostria sy ny varotra na ao amin’ny tranonkala www.fihariana.com ireo orinasa madinika sy salantsalany (PME), na ny orinasa lehibe na dia ny orinasam-pianakaviana te-hisitraka ny findramam-bola avy amin’ny tetikasa Fihariana aza. Tetsy an-daniny dia nilaza ny minisitry ny fambolena, Lucien Ranarivelo fa tanjona amin’ny tetikasa akohonakà ny hanampiana ireo orinasa misehatra amin’ny fiompiana akoho miisa 500. Orinasa 72 no efa nahazo fanampiana avy amin’ny Fihariana ary hamoaka akoho 144.000 isa ireo afaka 60 andro.

Tsirinasolo

Tia Tanindrazana

Samia mijoro ho an'i Gasikara.