Toekarena

Teknisianina navoaky ny ENAM Rasoloson Hery no “Major des Majors”

Toekarena
Alarobia 07 Jona 2017

Namoaka voalohany ireo teknisianina ambony miisa 174 nanaraka ilay fiofanana mitohy na “Formation continue Cycle Expertise” ny sekoly ambony Enam etsy Androhibe. Rasoloson Hery no Major des majors tamin’izany tao anatin’ny andiany “ Mamiratra”.

Niofana nandritra ny 18 volana izy ireo tamin’ireo karazana lalam-piofanana miisa efatra dia ny « Diplomatie et Relations Internationales », ny « Administration Publique », ny « Administration Financière » ary ny « Nouvelles Technologies de l’Information et de la Communication (NTIC) ». Antenaina hitondra avo ny fanarenana ny firenena ireto teknisianina ambony ireto. Sady manampahaizana ambony ihany koa mantsy izy ireo no vonona ny hiady amin’ny fahantrana. Marihina fa saika efa mpiasam-panjakana manana ny toerany avokoa ny ankamaroan’ireto mpiofana ireto, izay efa misy minisitra, mpitsara, mpisolovava, manamboninahitra …. Ny maripahaizana Bacc+5 no nahafahan’izy ireo nanaraka ny fiofanana izay fepetra takiana amin’ny mpiofana rehetra ihany koa. Ny Maitre Rasoloson Hery moa no Major des majors tamin’izany, voalohany tamin’ny lalam-piofanana (Diplomatie et Relations Internationales) narahiny ihany koa sady filohan’ny fikambanan’ireto mpiofana ireto. Nandritra ny fandraisam-pitenenana nataony no nanambarany fa tokony hapetraka amin’ny toerana tokony ho izy ny sekoly ambony ENAM sy ireo mpiofana nivoaka tao aminy mba tsy ho mena-mitaha amin’ny any ivelany.

Pati