Toekarena

Tataon-ketra ho an’ ny fako sy ny fanadiovana Mba hipaka mivantana any amin’ny vahoaka

Toekarena
Talata 24 Desambra 2019

Any amin’ny firenena mandroso dia tsy ahitana olona manarinary hodi-boankazo na fako eny an’ arabe satria hentitra ny azy ireo ny fampiharana ny lalàna.

Eto amintsika dia fahazaran-dratsy izany. Raha vao tenenina amin’ izany ny olon-tsotra dia tezitra. Mitobaka loatra ny fako ka mandoto tanàna no sady manentsina ny fantsona fivoahan’ny rano. Ho an’ Antananarivo Renivohitra, mahatratra hatrany amin’ny 700 taonina isan’andro amin’ny ankapobeany ny fako ao aminy ary maherin’ izany amin’ny fotoam-pahavaratra tahaka izao. Mikasika kosa ny fikojakojana ireny fotodrafitrasa iombonana ireny dia misy vola efa atokana amin’ izany amin’ny alalan’ny hetra aloan’ny olom-pirenena. Eto amintsika dia misy tataon-ketra amin’ ny trano fonenanana atao hoe « Redevance ordures ménagères » sy ny « redevance Assainissement eaux usées » hita amin’ ny any faktioran’ny JIRAMA saingy tsy milamina hatreto na ny fitantanana ny fako na ny rano maloto. Ny SAMVA (Service Autonome de maintenance de la ville d’Antananarivo) moa no mitantana izany. Na dia eo aza izany dia tena ilaina ny fanaovana fanadiovana iombonana aorian’ny krismasy sy faran’ny taona. Tsy tokony atao fahazarana izany satria raha samy manadio ny manandrify ny tranony sy ny lalana mifanila amin’ izany dia hadio ny tontolo.

MarignyA.