Toekarena

Partagé sur :
• facebook

Tsara ny vokatra lodsia tamin’ity taona 2019 ity, araka ny tatitry ny Fikambanana Tambatra tetsy amin’ny Tobim-piantsonana Gare Makis tetsy Andohatapenaka.

 Olana kosa anefa ny fitontongam-bidin’ny vokatra izay mampikaikaika ny tantsaha. Nanambara ireo Vondrona tanora  ao anatin’io fikambanana io fa mamono tanteraka ny tantsaha ny ataon’ireo mpanera izay maka lodsia amin’ny vidiny tena ambany ary mivarotra izany amin’ny vidiny midangana. 700 hatramin’ny 1000 Ariary no fangalan’ireo mpanera ireo ny vokatra eny am-potony ary amidin’izy ireo 1500 Ar izany farafahakeliny. Amin’izao fotoana izao dia lafon’izy ireo amin’ny mpanondrana 2000 Ar mihitsy satria efa manomboka tsy misy ny vokatra, hoy ny nambaran’ny filohan’ny Fikambanana Tambatra, Andriamanangana Aldo. Soa fa misy hoy izy ny fiaraha-miasa amin’ny Ministeran’ny Fambolena sy ny Varotra ary ny Fitaterana amin’izao fotoana izao mba hahazoan’ny mpamboly sy ny mpanamboatra garaba ary ireo mpisehatra amin’ny famokarana lodsia eny am-potony mba mba mahazo tombony kely amin’izao fotoana izao. Misy rahateo ny fandaharan’asa Formaprod izay nanofana ireo tanora mpikambana mahatratra 300 ao amin’ny Fikambanana Tambatra mba ho tohana sy hiteraka famoronan’asa maharitra ho azy ireo. Omaly no nampiseho ireo vokatra lodsia teny Andohatapenaka ireto tanora avy any amin’ny faritra Atsinanana ireto izay tonga nivarotra ny vokatra ho 3500Ariary ny 2 kilao. Aorian’ny vokatra lodsia moa dia hiditra amin’ny Ankondrolahy indray ireto tanora mpamboly ireto.

Tsirinasolo

Tia Tanindrazana

Samia mijoro ho an'i Gasikara.