Toekarena

Taom-baovao iraisan’ny Malagasy rehetra Nankalazaina teny Ambohimanga, omaly

Toekarena
Zoma 22 Septambra 2017

Nankalazaina nanomboka omaly alakamisy 21 septambra teny Ambohimanga ny taom-baovao iraisan’ny foko 18, karakarain’ny Komity Mpikarakara ny taona vaovao iraisan’ny Malagasy eto Madagasikara sy ny komity MAMAFI na Malagasy Mampiray Firenena.

Raiamandreny marobe isam-paritra, notronin’ireo olobe ao amin’ny tranoben’Imerina Ambohimanga no tonga nandray anjara tamin’izany, lanonana hitohy amin’ny fitokanana ny tsangam-baton’ny firaisam-pirenena anio zoma, ho mariky ny firaisam-pirenena sy ny taom-baovao tokana ho an’ny Malagasy rehetra. Nivoitra nandritra ny fandraisam-pitenenana nataon’ny mpikarakara tamin’izany fa tsy manafoana ny taom-baovao fanaon’ny isam-poko akory ny hetsika tahaka izao fa natao hampitambatra ny Malagasy rehetra kosa. Ny volana septambra tahaka izao ihany koa no hanaovana izany, hoy hatrany izy ireo satria fotoana mampitsiry ny ahitra izao. Hofaranana amin’ny alim-pandihizana etsy amin’ny lapan’ny tanànan’Analakely moa ny lanonana anio hariva sady hanehoana ireo karazana kolontsaina mampiavaka ny foko 18 ihany koa.

Pati