Toekarena

Partagé sur :
• facebook

Ny synodam-paritany FJKM Boina vaovao no synoda faha-14 nanatanterahan’ny foibe FJKM sy ny CNaPS foibe fiofanana mikasika ny fiahiana ara-tsosialy. Tanjona iraisana ny tsy hahavery zo ny mpiasa na ny eo anivon’ny fiangonana na ny eny anivon’ny sekolim-pinoana, ka nampahafantarina ireo mpizaika tany Mahajanga, nandritra ny roa andro, ny adidy aman’andraikitry ny mpampiasa sy ny zon’ny mpiasam-piangonana.

Mahatratra 246 ny isan’ny fiangonana ao anatin’ny Synodam-paritany FJKM Boina vaovao. Miisa 77 ny fitandremana ary 8 ny sekoly. Miisa 8 ihany koa ny toeram-pitsaboana. Samy mampiasa olona avokoa ireo toeram-piasana avy amin’ny sehatra samihafa ireo ka ny CNaPS no miandraikitra ny fiahiana ara-tsosialin’izy ireo. Nahazo tombony tamin’ny fiofanana ny mpitandrina, ny katekista, ny mpampianatra sy mpitsabo ao anatin’ny Synodam-paritany Boina vaovao. Efa saika mpikambana CNaPS avokoa ny eo anivon’ny fiangonana, raha toa ka misedra olana kosa ny sekoly amin’ny fanefanany latsakemboka eo anivon’ny CNaPS noho ny hakelin’ny saram-pianarana, hoy ny mpitandrina Rakotomalala Jean Olivier prézidà synodaly Boina Vaovao. Vahaolana hafa no tsy maintsy karohina, hoy hatrany ny filohan’ny synoda.Nivoitra nandritra ny atrikasa ireo karazana fanampiana omen’ny CNaPS ho an’ny mpiasa sy ny vady aman-janany, izay marihina fa tsy maintsy anaovana fangatahana avokoa miaraka amin’ireo antontan-taratasy havaozina isan-taona mba tsy hampiatona ny zo. Distrika fito moa no mandrafitra ny synoda Boina Vaovao manomboka any Soalala, Mitsinjo, Mahajanga Voalohany sy Faharoa, Marovoay, Ambato-Boeny, Tsaratanàna ary Maevatanàna.

RTT

Tia Tanindrazana

Samia mijoro ho an'i Gasikara.