Toekarena

Soavinandriana Itasy Fianakaviana 300 mahery no ahiana ho very fivelomana

Toekarena
Zoma 04 Aogositra 2017

Hitrangana ady tany goavana any Soavinandriana, Faritra Itasy amin’izao fotoana izao. Fianakaviana 300 mahery mivelona amina tany 569 ha mantsy no ahiana ho very asa fivelomana.

Raha araka ny fanazavan’ny solontenan’izy ireo tamin’ny mpanao gazety omaly dia efa tamin’ny andron’ny fanjanahan-tany ny razam-ben’izy ireo no nanajary io tanibe io izay nomarihiny manokana fa tany volkanika tena mamokatra tokoa. Niezaka ny nikarakara izany tany izany izy ireo mandraka ankehitriny no sady efa nangataka izany tamin’ny fanjakana ihany koa. Ankehitriny anefa dia velon-taraina izy ireo fa misy Ministra iray teo aloha mikasa ny hanala azy amin’io tany io no sady ato ho ato fa tsy afaka miandry. Raha sanatria ka tanteraka izany hoy hatrany ity solontenan’ny mponina avy any Soavinandriana ity dia mponina an’arivony no ho very asa tanteraka ka tsy hisy hianatra intsony hatramin’ny mpianatra. Raha araka ny fantatra hatrany moa dia katsaka no volen’izy ireo amin’io tany 569 ha io ankehitriny. Hisy ny fitondrany ny raharaha fanin-droany eo anivon’ny Fitsarana taorian’ny efa niakaran’izany voalohany.

Pati