Toekarena

Sehatry ny asa Misongadina hatrany ireo mandalo fampiofanana

Toekarena
Zoma 21 Febroary 2020

Tena ilaina ny fampiofanana amin’ny fidiran’ny tanora amin’ny sehatry ny asa.

Na ireo efa mpiasa aza dia mbola afaka miofana hanatsarana ny fahaiza-manao, hoy ny teo anivon’ny upsilon. Ity farany izay nanao fanadihadiana manokana ny amin’ny filàna misy eto Madagasikara ary niara-miasa amin’ny Malagasy Talent Management. Hita fa tsy ampy ny fampiofanana misy kanefa manankarena olona i Madagasikara. Araka izany dia misy ny tolotra amin’ny fampianarana ampitain-davitra (formation à distance) manampy ny tanora hitady asa sy hanamafy ny traikefan’ireo izay efa ao anatin’ny tontolon’ny asa. Nampahafantarina tetsy amin’ny Tranoben’ny Varotra sy Indostria Antaninarenina omaly izany ary ahafahana mahazo fanamarinana (certificat) mihitsy. Misy lalan-tsaina maro azo isafidianana ka anisan’izany ny resaka fitantanana mpiasa, ny famolavolana tetikasa ary ny resaka varotra sy ny teknolojia. Tanjona ny mba ahazoan’ireo tanora asa haingana sy mba ahafahan’izy ireo mivelatra sy mahafehy tsara ny asany manoloana ny fianarana sy ny fampiofanana noratoviny. Izay liana amin’ity tolotra ity moa dia afaka mijery ny www.upsilon.éducation, hoy ny tompon’andraikitra eo anivon’ny Collège de Paris, Ouvrier De Lagarde.

Tsirinasolo