Toekarena

Sehatra iraisam-pirenana Tsy resy lahatra hamatsy vola intsony

Toekarena
Alatsinainy 12 Martsa 2018

Votsotra ny famatsiam-bola maro noho ny afitsok’ity fitondrana ity. Tsy resy lahatra amin’ny fomba fitantanana mihitsy ny sehatra iraisam-pirenena.

Nihemotra kilasy indray aza moa i Madagasikara ny amin’ny ady amin’ny kolikoly. Very isa 2 sy toerana 10 be izao tamin’ny 2017 araka ny tatitry ny Transparency International. Ankoatr’izay hita mibaribary ny lalana zara fa vita sy petatoko atao etsy sy eroa izay mahamenatra mihitsy rehefa sendra orana. Manginy fotsiny ny tsy fahaiza-mitantana sy tsy fahaiza-manao amin’ny lafiny rehetra ataon’ny fanjakana. Noho ny tsy fahamatorana, maro ny mpamatsy vola sy mpampiasa vola efa manidy ny mpaompiny. Ny sinoa efa tamana aza moa nanjary mitsoaka tsikelikely noho ny fitiavam-bola mihoapampan’ny fanjakana. Izany no mahatonga an’ity fitondrana ity hita ho tena sahirana ara-bola. Manavotr’aina amin’ny fampiakaran-ketra sy ny famehezana ny vola mivoaka toa ny tsy fanondrotan-karaman’ny mpiasa. Hany ka ny vahoaka tsy manan-tsiny no mizaka ny tsy eran’ny aina. Misondrotra avokoa ny vidin-tsolika, ny faktioran’ny jiro, ny vidim-bary ary inoana marimarina fa mbola hiakatra hatrany izany raha izao fitavozavozana sy tsy fahamatorana izao no mitohy.

Tsiry