Toekarena

Partagé sur :
• facebook

Lazaina mandrakariva fa firenena manankarena amin’ny harena ankibon’ny tany i Madagasikara.

Tsy miteraka tombontsoa amin’ny vahoaka Malagasy ary tsy misy fiantraikany goavana amin’ny kitapom-bolam-panjakana mihitsy anefa ny fitrandrahana sy ny fanodranana ireny fa ireo vahiny hatrany no mahazo tombony sy manankarena. Olana hatrany ny tsy fananana ny traikefa, ny fahaiza-manao sy fanofanana, indrindra ireo hoenti-manana sy ny fitaovana maro samihafa hanatanterahana ny fitrandrahana ka ambakain’ireo vahiny fotsiny. Tombony ho amin’ny firenena hafa hatrany matetika ireo fifanarahana sy ny fiaraha-miasa atao na ny eto Afrika na amin’ireo firenena matanjaka fa zara raha mampidi-bola amin’i Madagasikara.  Ny ankabeazan’ireo Malagasy mba misehatra amin’ny harena ankibon’ny tany dia tsy ara-dalàna rahateo ary tsy mandoa hetra ka tsy hita ny akony ara-toekarena. Izany ihany koa no antony mbola anjakan’ny kolikoly tanteraka amin’io sehatra io. Tamin’ny taona 2013 aza moa dia nilaza mihitsy ny avy eo amin’ny Transparency International fa very 230 tapitrisa dolara i Madagasikara tamin’ny volamena sy ireo vato sarobidy. 2 taonina ihany no volamena nanaovana fanambarana tamin’izany. Manampy trotraka ny hafetsen’ireo vahiny miditra eto amin’ny firenena izay mampiasa ny visa fizahantany kanjo miasa manao fitrandrahana kanefa tsy voara-mason’ny fanjakana akory. Tahaka ny sehatra rehetra mitotongana mila jeren’ny fanjakana dia anisan’ny tokony handraisana andraikitra haingana ihany koa ity sehatra ity izay be kolikoly kanefa tokony hampidi-bola be.

Tsirinasolo

Tia Tanindrazana

Samia mijoro ho an'i Gasikara.