Toekarena

Partagé sur :
• facebook

Nanomboka omaly alakamisy 13 jona teny amin'ny CCI Ivato ny salon ITM (International Tourism Fair Madagascar) andiany fahavalo.

Mpandraharaha an-jatony misehatra eo amin'ny tontolon'ny fizahantany no tonga ary niezaka nampiseho ny mampiavaka azy ny faritra tsirairay. Nanatevin-daharana teny ihany koa ireo mpandraharaha vahiny maro be ary niavaka ny firenena Indonezia izay nasaina manokana tamin’ity ITM 2019 ity. Nampiseho ny talentany tamin’ny fahandroana sakafo sy ny hira ary ny dihy izy ireo. Anatin’ny 4 andro no hanatanterahana ny hetsika izay nanambaran’ny minisitry ny fizahantany, Randriamandranto Joel fa tsy maintsy hiteraka tombony ara-toekarena haingana ny sehatra fizahantany eto Madagasikara. Tsy vitan’ny hampiditra vola vahiny ihany fa hampiroborobo ny fandraharahana sy hampahafantatra ireo toerana maro tsara tsidihina eto amin’ny firenena. Eo ihany koa ny fampirisihina ireo sehatra tsy ara-dalàna hiditra amin’ny ara-dalàna amin’izay amin’ny alalan’ny fanisana ireo mpandraharaha manana tolotra amin’ny fizahantany hanatrarana ilay tanjona hampiditra mpizahatany miisa 500 000 amin’ny 2023. Tetsy an-daniny, nilaza ny praiminisitra Ntsay Christian fa hipetraka amin’ny sehatra fizahantany mihitsy ny fanantenan’ny Malagasy amin’ny sehatra fampandrosoana. Efa nanao ny ezaka rehetra ny governemanta, hoy izy ny amin’ny nametrahana ny fandriampahalemana izay tena nampikaikaika ny mpandraharaha. Tsy ampy izany fa ilaina ny ezaky ny rehetra mba hisy akony lehibe amin’ny toekarena ny fizahantany, hoy izy.

Tsirinasolo

Tia Tanindrazana

Samia mijoro ho an'i Gasikara.