Toekarena

Sambaina Manjakandriana Hisy orinasa maro hatsangana, hanampiana ny tanora

Toekarena
Talata 12 Desambra 2017

Orinasa maro sy lehibe no hatsangana eo anivon’ny kaominina ambanivohitra Sambaina, distrikan’i Manjakandriana ato ho ato entina hanomezana asa ny tanora, hoy Randrianasolo Iandry Balsama, lefitra voalohan’ny ben’ny tanàna ao an-toerana.

Ny mba hahafahana mampivoatra ny fiainan’ireo tanora mihitsy no tanjona, hoy izy fa tsy hionona fotsiny amin’ny fiompiana sy ny fambolena toy ny mahazatra hatramin’izay. Ankoatra izay dia nezahina nampiroboroboana eo anivon’ity kaominina ity ihany koa ny lalao baolina kitra hisorohana ireo tanora tsy hanaotao foana. Nifarana tamin’ny alahady teo, ohatra, ilay lalao Fanarenana, Firaisankina ary Super Coupe notanterahina nandritra ny enim-bolana teny anivon’ireo fokontany miisa 15 izay nizarana omby miisa roa, ondry roa ary kalisy miisa 13. Tanora an-jatony no nahazo tombontsoa tamin’izany, hetsika iray izay tsiahivina fa tena nampandroso ny distrikan’i Manjakandriana tokoa. Tsiahivina fa tao amin’ny kianja FIFA sintetika ao Carion no nanatanterahana ny lalao izay voatery naato kely indray aloha mba hahafahan’ny bozaka maniry.

Pati