Toekarena

Salon International de l’Habitat Raikitra ny andiany faha-19

Toekarena
Alarobia 11 Oktobra 2017

Nambaran’ny « agence Premiere Ligne » tarihan’Andriamatoa Dominichi Ramiaramanana teny amin’ny Louvre Antaninarenina omaly talata 10 oktobra fa hotanterahina eny amin’ny Forello Expo eny Tanjombato ny 19 ka hatramin’ny 22 oktobra 2017 ny « Salon International de l’Habitat » andiany faha-19.

Fantatra fa orinasa miisa 130 no hampiranty ny zava-bita manara-penitra (manaraka ny « règle de l’art ») vokarin’izy ireo tsirairay avy ao anatin’ny tranoheva miisa 550. Nambarany fa efa tany amin’ny enim-bolana nialoha ny hetsika dia efa vonona tanteraka ireo mpandray anjara rehetra ary efa tapitra voafandrika avokoa ny toerana rehetra eny amin’ny Forello Expo. Nomarihan’i Dominichi omaly fa hanana ny toerana sahaza azy manokana ny famoronana Malagasy amin’ity hetsika ity na dia eo aza ny fahatongavan’ireo vokatra an-jatony avy any ivelany. Efa vonona ihany koa ireo mpanohana ofisialy sy ireo mpiara-miombon’antoka rehetra. Ho hita ao amin’ity « Salon de l’Habitat » ity avokoa ireo singa rehetra mifamatotra amin’ny fanorenan-trano manontolo na ny fanaovana taotrano na ny fanaka isan-karazany na ny « équipements » na fampihaingoana atiny sy ivelany ary ny famatsiam-bola hoenti-manana ihany koa.

Ntsoavina Evariste