Toekarena

Rado Ratobisaona Tsy misy politikan’ny vola ratsy fa …

Toekarena
Alarobia 30 Aogositra 2017

Antony iray tsy mampandroso an’i Madagasikara ny tsy fisiana politika ara-bola mazava raha ny filazan’ireo mpahay toekarena sasantsasany.

Singa iray amin’ireo telo mandrafitra ny politika ara-toekarena ihany moa ity farany, hoy i Rado Ratobisaona. Tsy afa-misaraka amin’ny tontolon’ny vola mantsy ny lafiny ara-ketra sy ny sehatry ny fitantanana ny tetibola. Olana amin’ny safidy miaraka amin’ny fahaizana mampiasa azy io anefa matetika no tranga mpiseho fa tsy misy politikan’ny vola ratsy ateo. Tanjona napetraky ny mpitondra fanjakana ankehitriny eto amin’ny firenena ny fifehezana ny vidin-javatra miaraka amin’ny fitazonana ny sandan’ny vola Malagasy manoloana ireo vola vahiny fifanakalozana eo amin’ny tsena iraisampirenena dia ny «euro» sy dolara. Lesoka hita kosa hatreto ny fanaovana ankilabao ny tontolon’ny famokarana hampiakarana ny harinkarena eto Madagasikara, araka ny fanazavany. Voailikilika tsy afa-misitraka findramam-bola eny amin’ny banky, ohatra, ny sehatra tsy miankina amin’ny ankapobeny. Teboka iray goavana tsy voajerin’ny fitondrana ihany koa ny lafiny famoronana asa izay mazàna mifandraika mivantana amin’ny fidangan’ny vidim-piainana eo anivon’ny firenena iray, hoy ity mpandalina ny taranja ekonomia ity.

Ramano F.