Toekarena

QMM Tolagnaro 4 andro izao no tsy nihodina intsony ny ozinina

Toekarena
Alatsinainy 04 Jona 2018

Efa ho 4 andro izao no tsy nihodina intsony ny ozinin’ny QMM mpitrandraka fasimainty ao Tolagnaro satria tsy afaka namonjy ny toeram-piasana ny mpiasa.

Misy ny andian’olona manao barazy ary misakana ny lalana mankany amin’ny ozinina. Raha ny angom-baovao natao dia ilay resaka vola tambiny tamin’ny fakana ny tany no olana. Kely loatra ny vola nomena anay, hoy ireto olona ireto ka takianay ny hanamboarana azy io. Re fa efa misy ny fifampiresahana eo amin’ny an-daniny sy ny an-kilany mba hikarohana vahaolana satria tena hisy akony ratsy amin’ny orinasa ny fikatsoana. Tsy maintsy hajaina mantsy ireo kaomandina entana efa nohafaran’ny mpiara-miasa avy any ivelany kanefa mikatso ny asa eto an-toerana. Mifanandrify indrindra amin’ny savorovoro sy krizy politika misy eto amin’ny firenena no ipoiran’izao olana any Tolagnaro izao. Andrasana amin’ity fiandohan’ny herinandro ity izay mety ho fifanarahana eo amin’ireo olona manao ny fitakiana ka manao barazy sy ny mpitantana ny orinasa.

RTT