Toekarena

Olan’ny fandraharahana eto Madagasikara Manampy trotraka ny ataon’ny fadin-tseranana

Toekarena
Zoma 18 Janoary 2019

Misedra olana goavana ny sehatra fandraharahana hoy i Randriamampionona Joseph Martin na i Dadafara amin’izao fotoana izao.

Ankoatran’ny fangalaran’ny mpitondra sy ny fahantran’ny vahoaka dia manao ny ataony ihany koa hoy izy ny fadin-tseranana. Iaraha-mahalala fa mikoroso fahana ny sandam-bola Malagasy ary mihena hatrany ny fampidiram-bola vahiny kanefa ny harem-pirenena mivoaka malalaka. Nankaiza izao ny vola be noraisin’ny fanjakana teo aloha mitentina 2,5 miliara dolara tamin’ny sambo Sinoa miisa 330 hoy izy? Fantatra fa tsy naiditra taty amin’ny Banky eto Madagasikra izany. Fa tena loza mitatao sady mamotika mpandraharaha Malagasy ny ataon’ny fadin-tseranana amin’izao fotoana izao hoy i Dadafara. Mampandoa vola be ny mpandraharaha ny fadin-tseranana sady mila vaniny no lasa be pitsopitsony mahataraiky hoy izy. Efa korofohana ny entana any amin’ny seranan-tsambon’ny Toamasina ary mbola hatao izany ihany rehefa tonga aty Antananarivo. Rehefa mba te hampitombo vola ampiasaina ka tratrany tsy manao fanambarana na dia 10% monja aza dia asain’ny fadintseranana mandoa vola be mihoatra ny tokony ho izy ny mpandraharaha. Mba tena ilaina jeren’ny mpitondra firenena vaovao io fomba mamoehatra fanaon’ny fadintseranana mody mialokaloka eo ambany lalàna io hoy i Dadafara satria tena halatra sy fandrobana ary fanaparam-pahefana amin’ny mpandraharaha Malagasy.

Tsirinasolo