Toekarena

Mpanondram-bokatra Malagasy Sahirana amin’ny tanjaky ny «Ariary»

Toekarena
Sabotsy 23 Septambra 2017

Teboka iray nomarihan’ny Tahirimbola iraisampirenena tao anatin’ny tatitra nataony mikasika ny tomban’ezaka fizahana nataony teto Madagasikara nandritra ny roa herinandro ny tanjaky ny vola Malagasy.

6% mahery moa ny fiabon’ny sandan’ny «Ariary» mihoatra amin’ireo vola fifanakalozana eo amin’ny tsena iraisampirenena dolara sy euro, araka ny fampitam-baovao avy amin’ny FMI. Vaovao tsara hoan’ny toekarem-pirenena io fahasalaman’ny vola Malagasy io amin’ny ankapobeny. Tranga manamaloka ny tontolon’ny fanondranana entana ihany koa anefa. Misy akony ratsy hoan’ireo mpanondram-bokatra mankany ivelany tokoa mantsy ity fisondrotry ny sandan’ny Ariary ity manoloana ny fampiasam-bola eo amin’ny fifanakalozana iraisampirenena. Manafatra akora fototra vahiny avokoa moa ireo orinasa mpisehatra eo amin’ny fanondranam-bokatra Malagasy, izany hoe misanda azy ireo lafo nefa mivarotra vokatra amin’ny vidiny ambany.Tsy afaka mifaninana amin’ireo vokatra hafa noho izany ny vokatra Malagasy. Soso-kevitry ny mpandraharaha eo amin’ny tsena iraisampirenena hatreto ny fametrahana taha tsy miovaova saingy ilaina ny famaritana izao ao anatin’ny politikam-panjakana, hoy ny governoran’ny Banky Foiben’i Madagasikara.

Ramano F.