Toekarena

Mpandraharaha Malagasy Olana hatrany ny vola ampiasaina

Toekarena
Alarobia 23 Janoary 2019

Tokony hojerena haingana ny olan’ny mpandraharaha Malagasy ireo satria efa halohalika ny ranom-bary ary inoana fa hisy fanapahan-kevitra mafonja mihitsy hivoaka avy amin’ny fitondram-panjakana vaovao.

Amin’izao fotoana izao dia mihamora hatrany ny zana-bola any amin’ny bankin’ny mpandraharaha vahiny any ivelany, antony iray mahatonga azy hanondrana sy hivarotra mora ny entany rehefa tonga eto amintsika. Mifanohitra amin’izany, tsy afa-mihetsika ny mpandraharaha Malagasy satria ambony loatra ny zana-bolan’ny banky eto an-toerana. Mila vola betsaka anefa izy ireo indrindra ny amin’ny tetikasa lehibe mba hanafarana entana sy ampihodinana haingana ny vola. Manaraka izany dia mbola olana ihany koa ny fifaninanana tsy ara-drariny noho ny fahatongavan’ny entana vahiny tsy misy sivana mora be eto Madagasikara. Noho izany dia sahirana sy velon-taraina mihitsy ireo mpandraharaha Malagasy ary tena tsy afaka mifaninana. Etsy andaniny, fantatra fa 9,5% ny taha torolalana apetraky ny Banky foibe ary tsy maintsy maka tombony any amin’ny 4 na 5% any ho any ny Banky mpampindram-bola ka izay no mahatafakatra hatrany amin’ny 16 hatramin’ny 18% ny zana-bola alaina amin’ny mpanjifa sy ny mpandraharaha Malagasy. Araka izany dia kely ny vola azo alaina noho ny fidangan’ny zana-bola alain’ny banky ary tsy ahafahana manatanteraka tetikasa lavitr’ezaka. Voaresaka tanteraka io olana io tamin’ny fihaonan’ny filoham-pirenena vaovao tamin’ireo mpandraharaha tamin’ny fotoanan’ny fampielezan-kevitra ary hita soritra ao anaty vina IEM ka miandry ny vahaolana ny rehetra hanatsarana ny tontolon’ny fandraharahana.

Tsirinasolo