Toekarena

Partagé sur :
• facebook

Tsy misy fatiantoka ho an’ny sehatra tsy miankina, indrindra ny mpandraharaha, ny fanaraha-maso aorian’ny fandoavana fadin-tseranana (contrôle après dédouanement).

Nisy ny fifandresen-dahatra nataon’ny teo anivon’ny mpiasan’ny fadin-tseranana tamin’ireo mpandraharaha tetsy amin’ny Hotely Colbert Antaninarenina tamin’ny alarobia 12 desambra lasa teo. Amin’izao fotoana izao tokoa mantsy dia tsy maintsy atao ny fanaraha-maso rehefa avy mandoa hetra sy mandoa ny fadin-tseranana ny mpandraharaha. Tombony izany, hoy ny minisitry ny fitantanam-bola sy ny tetibola, Vonintsalama Sehenosoa Andriambololona, satria hanamora ny fandalovana sy ny famoahan’ny entana hafarana  ao amin’ny fadin-tseranana mba tsy ho ela izany. Fanamafisana ny maha ara-dalàna ihany koa ny entana tonga io fanaraha-maso atao io mba hialana amin’ny hosoka izay mety hiteraka fifaninanana tsy ara-drariny mampikaikaika ny sehatra tsy miankina. Nanambara ihany koa ny minisitra fa raha misy tratra amin’ny tsy fanarahan-dalàna dia mandoa lamandy ka alefa avy hatrany any amin’ny kitapom-bolam-panjakana ny vola azo. Ezaka atao iza hanatsarana hatrany ny fampidiram-bolan’ny fadin-tseranana ao amin’ny kitapom-bolam-panjakana na dia efa tsara aza ny vokatra tamin’ity taona 2018 ity. Nanamarika ihany koa ny minisitra fa noezahina tsy nokitikitihana sy novaovaina mihitsy ny karazan-ketra sy ny fadin-tseranana ary ireo taha manodidina izany nohon’ny fangatahan’ny sehatra tsy miankina mba tsy hanahirana azy ireo ny amin’ny fandraharahana ataony.

Tsirinasolo

Tia Tanindrazana

Samia mijoro ho an'i Gasikara.