Toekarena

Minisitry ny asa sy ny lalàna sosialy "Tsy maintsy hojerena ny olan’ireo orinasa"

Toekarena
Sabotsy 02 Mey 2020

Nikarakara hetsika vonjy ranovaky ny Sendika Indostrialy Madagasikara (SIM) omaly. Teny Anosy tamin’ny alalan’ny fanampiana: vary, savony, sôkôla,…no nanaovana izany.

Nangataka fepetra mba tsy hisian’ny fandroahana na fanenana ny isan’ny mpiasa, na koa fikitihana ny zony. Tsy nisy fanampiana azon’ny mpiasa tao anatin’ny 45 andro, hoy Atoa Barison Rakotomanga Sekretera jeneralin’ny SIM. Mitaky izahay hoe omeo karama ny mpiasa, fa ny mpampiasa sy ny fanjakana no mifampiresaka any ambadika any, hoy izy. Tsy tokony ho tapahana ao anatin’ny “congé” ihany koa ny karama, hoy izy. Hanao fanadihadiana kosa ny Ofisy Iraisam-pirenena momba ny asa na ny OIT hahazoana ny antontan’isa mazava. Tsy azo hafenina fa tena miteraka fahavoazana amin’ny orinasa sy ny fandraharahana ny zava-misy, hoy kosa ny Minisitry ny asa sy ny lalàna sosialy Gisèle Ranampy. Tsy maintsy hiroso amin’ny fanadihadiana sy ny tombana. Efa hita fa maro ny orinasa voatery niroso tamin’ny fiantohana teknika na manontolo. Tsy maintsy hisy ny fijerena ny vahaolana. Hisy ny dinika sosialy mba hiarovana ny mpiasa, hoy izy. Miandry an’izay ny rehetra!

Toky R