Toekarena

Miha manankarena hatrany i Chine Niakatra 6.8% ny harinkarena faobe

Toekarena
Alatsinainy 22 Janoary 2018

Anisan’ny vaovao farany nanaitra ny firenena maro ny fiakaran’ny harinkaren’ny sinoa tamin’ny faran’ny herinandro teo. Mihoatra ny tanjona nandrasana tokoa mantsy ny zava-nitranga tany Chine.

Ny fahamoran’ny fidirana amin’ny tontolon’ny asa sy ny fitomboan’ny Indostria mamokatra any an-toerana no antony nahatonga izany araka ny fanazavan’ny birao nasionalin’ny statistika (BNS). Nihena ihany koa ny fiakaran’ny vidim-piainana tany an-toerana ka izany no nahatonga ity firenena ity ho nisongona mora foana ireo firenena mifaninana aminy tahaka ny Philippines sy Thailande ary afaka mifaninana tsara amin’ireo firenena matanjaka. Olana mianjady amin’ny firenena sinoa ny fahanteran’ny mponina satria tao anatin’ny 10 taona farany dia niezaka mafy niady amin’ny fitomboan’ny mponina ny governemanta sinoa. Na dia izany aza dia miakatra hatrany ny fanondranana entana avy any aminy ary tsy vitan’izay fa miezaka mampiasa vola aty amin’ny tany mahantra tahaka antsika mihitsy ny kely maso. Eo indrindra no tokony hitandremana satria efa miditra amin’ny sehatra maro izy ireo eto amintsika ary miezaka manararaotra satria mahafantatra ny tsy fahaiza-manaon’ny mpitondra ankehitriny izay mora raviravizana amin’ny vola.

Tsiry