Toekarena

“Marché O Soldes” andiany voalohany Hotanterahina ny 23,24 ary ny 25 martsa izao

Toekarena
Alatsinainy 26 Febroary 2018

Hampiantrano hetsika ara-barotra goavana isika eto an-drenivohitra ny 23,24 ary 25 martsa ho avy izao. “Marché O Soldes” no anarana nampitondraina izany karakarain’ny B-COM &C. Eny amin’ny Village Voara Andohatapenaka hanatontosana azy io ahitana mpandray anjara hatrany amin’ny 200 isa.

Hampiavaka ny hetsika , hoy Rtoa Andriamalala, tompon’andraikitry ny serasera ny fisiana fihenam-bidy amin’ireo karazan’entana rehetra hatrany amin’ny 75 % raha manomboka amin’ny 5 % izany . Tanjona amin’ity hetsika ity ny hahafahana mampifaly ny rehetra mialoha ny hankalazana ny fetin’ny Paska amin’ny fiandohan’ny volana aprily ho avy izao. Karazan’entana maro no ho hita mandritra izany. Ankoatra ireo kojakojan-tokantrano toy ny salon complet dia ho hita mandritra izany ihany koa ny akanjo, ny kilalao, ny sakafo, ny finday izay marihina fa ahitana ireo karazany hiaka farany avokoa. Tsy hanavahana na ho an’ny ankizy na ho an’ny olon-dehibe. Manodidina ny 2.000 isa any ho any moa ireo mpitsidika andrasan’ny mpikarakara mandritra izany ka ho an’ireo maniry ny hivarotra eny an-toerana dia mbola azo hatao tsara ny manatona ny Immeuble Seimad 67 ha Porte C 1309 na azo hatao tsara ihany koa ny miantso ny laharam-pinday 034 46 491 01. 2.000 Ar ny vidim-pidirana misy ny toerana hahafahan’ny misakafo atoandro sy mampialavoly ny ankizy. Arahina lalao tombola mety hahazoana loka marobe ity hetsika ity.

Pati