Toekarena

Partagé sur :
• facebook

Ny Banky Foibe no mpandrindra sy mpanara-maso ny fifampivarotana rehetra rehefa avy mifantina ireo banky tsotra (primaire) hisehatra amin’ny Marché Interbancaire des Devises (MID) izy.

Rehefa izay dia mila manatona ireo banky tsotra ireo ny mpandraharaha hanafatra na hanondrana entana. Iaraha-mahalala anefa fa betsaka hatrany ny fanafarana entana noho ny fanondranana eto Madagasikara. Araka izany, mihena ny tahirim-bola vahiny ao amin’ny banky iray rehefa manao fanafarana satria vola vahiny no aloa amin’ny fividianana an’ilay entana avy any ivelany. Noho ny fahabetsahan’ny mpandraharaha Malagasy manafatra entana noho ny manondrana dia mitombo hatrany ny filana ny vola vahiny. Vokany, lasa lafo vidy hatrany ary mihem-bidy kosa ny sandan’ny vola Malagasy. Ankoatr’izay, miaka-bidy manaraka an’ilay vola vahiny ny entana hafarana avy any ivelany tahaka ny solika ary miteraka fiakaran’ny vidin’entana eto an-toerana. Araka izany, ny MID no mamaritra ny fiovaovan’ny sandan’ny Ariary ankehitriny. Fantatra ihany koa anefa fa ny banky ihany no mahazo tombontsoa amin’io satria maka tombony izy amin’ny fivarotany ny vola vahiny ao aminy ary mametra kosa rehefa hividy amin’ny olona tsotra na mpandraharaha iray. Ireto farany no mizaka ny mety ho fatiantoka na ny fiakaran’ny vidin’entana aterany. Nanomboka tamin’ny fanaovana ny MID dia lasa banky vahiny avokoa no miasa eto Madagasikara. Ny fanafoanana io sehatra io anefa dia mampihena ny vola avoaka any ivelany sy ahafahana mifehy ny fiovaovan’ny vidin’entana.ary indrindra hampiakatra hatrany ny fanondranana eto Madagasikara.

Tsiry

Tia Tanindrazana

Samia mijoro ho an'i Gasikara.