Toekarena

Maorisy-Madagasikara Hifampizara traikefa amin`ny ladoany Malagasy

Toekarena
Talata 07 Aogositra 2018

Tonga nitsidika tamin’ny fomba fifanajana ny praiminisitra Ntsay Christian, ny Ambasadaoron’i Maorisy eto Madagasikara, Sem Goburdhun Datakarran, omaly tetsy amin`ny lapan`i Mahazoarivo.

Vonona ny hanamafy hatrany ny fiaraha-miasa amin’ny firenena Malagasy ny tenany, izay mifantoka teo amin’ny ara-koltoraly sy ara-ekonomika. Mikasika ny fifanarahana eo amin’ny asa dia hisy ny fifampizarana traikefa eo amin’ny tompon’andraikitry ny ladoany Malagasy sy ny avy atsy amin’ny nosy maorisy, indrindra manoloana ny fisian’ny fanondranana an-tsokosoko. Navoitran’i Goburdhun Datakarran ihany koa fa efa nisy ny fifanaraham-piaraha-miasa voasonia ka eo amin’ny lafiny ara-barotra dia fifanarahana ho amin’ny fanatsarana ny kalitao amin’ny ankapobeny; hamafisina bebe kokoa ny fifanakalozana ara-barotra eo amin’ny fanafarana entana, ary hohatsaraina ny vokatra eo amin’ny firenena roa tonta. Eo amin’ny fifanaraham-piaraha-miasa ara-koltoraly indray, dia nohamoraina ny fifampizarana traikefa eo amin’ny mpanakanto Malagasy sy ny avy any Maorisy ary maniry ao anatin’izany ihany koa ny fampiroboroboana ny fizahantany eto Madakasikara.

Marigny A.