Toekarena

Lalànan’ny tetibola nasiam-panitsiana Tsy ampy ny natokana ho an’ny sosialy

Toekarena
Talata 30 Jona 2020

Lany tsy nisy fanovana na nasiam-panintsiana teo anivon'ny Antenimieram-pirenena teny amin'ny CCI Ivato ny lalàna mifehy ny tetibola nasiam-panintsiana 2020 (LFR 2020).

Raha tsiahivina dia solombavambahoaka 94 tamin'ireo 103 tonga nivory no nandany izany. Raha ny toe-java-misy amin’izao fotoana izao dia tokony ho betsaka ny tetibola natokana ho an’ny sosialy. Nahena avokoa ny ankabeazan’ny fandaniana eny anivon’ny ministera satria efa mazava ny resaka fa sahirana ara-bola ny fanjakana.Hita fa mbola tsy ampy mihitsy ny natokana ho amin’ny sosialy. Tokony natao ho laharam-pahamehana tao anatin’ny fandinihana ny LFR mihitsy anefa ny fijerena ny lafiny sosialy izay tena miantraika mivantana amin’ny vahoaka ; tetikasa maharitra mandavan-taona no antenain’ny olona fa tsy kizarazara tsy misy fotoana mazava. Tsy hita taratra ny fisian’ny tetibola ambony ho fitsinjovana ny vahoaka vokatry ny krizy ateraky ny valanaretina coronavirus. Mazava ho azy fa hiankina hatrany amin’ny famatsiam-bola avy any ivelany ny fitondram-panjakana amin’ny fiahiana io lafiny sosialy io ; ary raha tsy nisy ireo fikambanana iraisam-pirenena maro samihafa, dia asa fotsiny izay nitranga teto.

Tsirinasolo