Toekarena

Krizy eto Madagasikara Mihamafy ny fisondrotam-bidim-piainana

Toekarena
Alatsinainy 15 Jona 2020

Efa ambony hatrany ny tahan’ny sondro-bidim-piainana nanomboka ny taona 2017 hatramin’ny faran’ny taona 2019. Mbola hita mihamafy hatrany izany amin’izao fisian’ny valan’aretina eto Madagaskara izao.

Tsy tana fa miroso tsikelikely sy miandalana mankany amin’ ny fidanganam-bidim-piainana mafimafy kokoa ny eto amin’ny firenena. Efa tsy lazaina intsony ny fisoko-miadan’ny entana ilaina andavanandro tahaka vary, ny menaka, ny sira sy ny sisa izay mampikaikaika ny Malagasy. Amin’izao fotoana izao dia saika niaka-bidy izany ary samy manao ny saim-pantany ny mpivarotra. Tsy hita mihitsy ary tsy fantatra mazava indray hoe aiza ho aiza ireo sampana mazava mijery manokana ny fisondrotan’ny entam-barotra. Tsy mitsaha-mitotongana ihany koa ny Ariary ankehitriny. Araka ny fanazavan’ny Banky Foiben’I Madagasikara dia nohon’ny fihenan’ny vola vahiny miditra ny anton’izany satria mbola tsy tena misokatra ny sisintany. Mila mividy na mampiditra vola vahiny ny firenena Malagasy mba hanetsemana ny lavaka sy fatiantoka. Mbola tsy nisy fitotonganana tahaka ny tamin’ity volana Jona ity satria nahatratra 3,15% izany oharina amin’ny dolara ary 5,10% be izao izany fihenan-danja izany raha oharina ny Euro. Izany rehetra izany no hiteraka fahefa-mividy ambany ho an’ny Malagasy ary ampoizina ny fitarazohan’ny fidanganam-bidim-piainana raha tsy misy fepetra matotra raisin’ny fitondram-panjakana.

Tsirinasolo