Toekarena

Partagé sur :
• facebook

Nampahafantarina omaly tetsy amin’ny Telma Ankorondrano ny andinindininy mikasika ilay tolotra vaovaon’ity orinasa ity dia ny “carte bancaire Visa Mvola”. Iny omaly iny ihany koa moa no fotoana nivoahany tamin’ny fomba ofisialy.

Araka ny fanazavan’ny tale jeneraly misahana azy io, Heritiana Andrianasolo, dia fiaraha-miasa amin’ny banky BNI izy ity ary mampifandray ny kaonty amin’ny finday sy ity karatra fampiasa amin’ny banky vao nivoaka ity. Toy ny karatra iraisam-pirenena rehetra dia ahafahana maka vola eny amin’ireo mpandrinjara na DAB eny amin’ireo banky manerana ny nosy sy tany izy io. Ahafahana mandoa vola eny amin’ireo toerana voatokana ho amin’izany na TPE ihany koa sy aterineto. Nomarihina kosa anefa fa 24 ora aorian’ny fandoavam-bola anaty aterineto vao mety ho tonga any amin’izay tokony ahatongavany ilay tolotra. Mba hitandrovana ny karatra ihany koa dia tsy mbola mandeha aloha ny fifampindram-bola sy fandoavam-bola amin’ny alalan’izay aterineto izay any ivelany. Anjaran’ny tompon’ny karatra kosa no mamaha izany amin’ny fotoana ilany azy. Hatreto dia mbola tsy afaka handraisam-bola avy amin’ny kaonty anaty finday izy ity saingy azo handoavam-bola sy hividianan-javatra kosa. Ariary no ao anaty kaonty fa ilay Visa kosa dia afaka mamadika ny devizy raha toa ka ilaina amin’ny fanjifana any ivelany, hoy hatrany ny fanambaran’ity tale jeneraly lefitra ity.

 J. Mirija

Legende: Hihena miandalana ny fikirakirana vola taratasy

Tia Tanindrazana

Samia mijoro ho an'i Gasikara.