Toekarena

Kaominina Ambavahaditokana Fotodrafitrasa 3 sosona no notokanana

Toekarena
Sabotsy 24 Jona 2017

Fotodrafitrasa 3 sosona no notokanana tao amin’ny kaominina Ambavahaditokana, distrikan’Antananarivo Atsimondrano omaly, dia ny birao vaovaon’ny fokontany Amboatavo,

ny birao nohavaozina ao amin’ny fokontany Antanjona ary ny tobim-paritra (Poste Fixe) an’ny zandary miasa eo anivon’ity kaominina Ambanivohitra ity. Ny 80%-n’ny fandaniana tamin’ireo fotodrafitrasa ireo dia avy amin’ny tolotanana mivantana nataon’ny mponina avokoa. « Ny tsy manana sy ny tsy mahakolokolo anefa dia mitovy ihany », hoy ny Ben’ny tanàna Ratianarivo Andriamihaja Bruno, koa nanentana ny fandraisana andraikitry ny tsirairay ny tenany mba hahitam-bokany ny fiezahana hampandroso ny tanàna. Ny solombavambahoakan’i Madagasikara Raharimanarivo Voahangy, voafidy tao Antananarivo Atsimondrano kosa dia nankasitraka ny ezaka ataon’ny Ben’ny tanàna sy ny ekipany ary ny faharisihan’ny vahoaka amin’izay tolo-tanana ilaina amin’ny asa toy itony. Mbola maro anefa ny adidy miandry koa niantso ny fahafoizantenan’ny tsirairay hatrany izy handray anjara mavitrika amin’ny fampandrosoana an’Ambavahaditokana. Ny lehiben’ny Distrikan’Antananarivo Atsimondrano no solontenam-panjakana nanatrika ny lanonam-pitokanana teny an-toerana.

Toky R