Toekarena

Fivorian` ny parlemantera Ho voaboasana ny LFI 2021

Toekarena
Talata 20 Oktobra 2020

Misokatra anio ny fivoriana ara-potoana faharoa hatao eny amin` ny Antenimieram-pirenena sy ny Antenimierandoholona. Ho an`ny Antenimieram-pirenena manokana dia tahaka ny fivoriana farany teo tamin` ny volana mey ihany ny toerana hanatanterahina izany ka eny amin`ny CC Ivato ny fotoam-pivoriana.

Noho ny mbola fisian` ny valanaretina Covid 19 eto ka mba hahafahana manaja ireo fepetra iadiana amin` ny aretina no antony ny fanapahan-kevitra. Na dia fananam-panjakana aza ny CC Ivato dia fantatra fa mitentina 3,8 tapitrisa ariary isan-andro no hofan` ity toerana ity izay tsy maintsy aloan` ny fitondram-panjakana. Marihana fa haharitra 60 andro ny fivoriana ara-potoana ataon` ireo parlementera. Hovoaboasana mandritra ity fikaonan-doha mikaton-trano ity ny momba ny tetibolam-panjakana lasitra (LFI) taona 2021. Fantatra fa hifantoka bebe kokoa amin`ny fampivelarana ny lafiny sosialy sy ara-toekarena ny fampiasam-bola amin`ny taona ho avy. Anisan` ny hodinihana ny antsipirian` io tetibola vaovao ka hita eo raha hahazo fankatoavana avy amin` ireo solombavambahoaka izany na tsia. Aorian`ny fanapahan-kevitra horaisin` ireo loholona no hamerenana an`io volavolan-dalàna io eny amin` ny Antenimieram-pirenena. Ireo depiote kosa no ho tompon` ny teny farany. Ankoatra izay, ho resahina ny fizarana momba ny faritra Vatovavy sy Fito Vinany.

Marigny A.