Toekarena

Fivahiniana ara-toekarena natao tany Canada Afa-po tanteraka ireo mpandraharaha Malagasy

Toekarena
Alarobia 22 Novambra 2017

Tontosa soa aman-tsara ny 21 ka hatramin’ny 28 oktobra lasa teo tany Canada ilay fivahinianana ara-toekarena sy ara-barotra nokarakarain’ny tranoben’ny varotra eto Madagasikara sy any Canada.

Afa-po tanteraka ireo mpandraharaha Malagasy miisa 15 nandray anjara tamin’izany, araka ny tafa nifanaovan’izy ireo tamin’ny mpanao gazety ny alatsinainy hariva teo. Anisan’ireny Rtoa Eliane Rakotozafy izay nanantitrantitra fa sambany no nisy hetsika nanomezana vahana ny mpandraharaha Malagasy tany ivelany tahaka ireny no tena nahafa-po azy tanteraka. Raha araka ny fanazavany hatrany mantsy dia afaka niresaka mivantana tamin’ireo mpikambana eo anivon’ny tranoben’ny varotra any Canada izy ireo no afaka nanazava ny momba an’i Madagasikara ihany koa. Betsaka amin’ireo teratany vahiny mantsy no tsy mahalala izay tena zava-misy marina eto amintsika ankoatra ireo hitan’ny masony ihany. Manantena ny hahita vokatra tsara hihatra mivantana amin’ny asa fiveloman’ireo mpandraharaha eto amintsika ireto mpandraharaha Malagasy 15 nandeha tany Canada ireto. Tsara ny mampahatsiahy fa firenena miisa 34 maneran-tany ihany hatreto no manana fahafahana handefa entana any Canada ka anisan’izany isika eto Madagasikara izay tsy handoavana hetra.

Pati