Toekarena

Partagé sur :
• facebook

Orinasa efa teo hatramin’ny taona 2004 ny Base Toliara, hoy ny Fikambanan’ny masikoro arivolahy na FIMA, izany hoe efa maro ny mpitondra nifandimby niara-niasa taminy.

Toliara Sands moa no anarany tamin’izany fa taty aoriana rehefa niova ny tompony dia io lasa hoe Base Toliara io, hoy ny filoha lefitr’ity fikambanana ity, Elia Rabevahiny. Ao Ankilimalinike, distrikan’I Toliara II no misy azy. Nahazo fahazoan-dalana hitrandraka izy ary teo vao fantatr’ireo mponina hoe hay zavatra mihoatra noho ny nifanarahana no heverin’ilay orinasa hatao. 2 na 3 taona lasa teo moa dia nidiran’ny olona mihitsy ilay toerana mba tsy hiasan’ny mpiasa tao. Mandeha ny resabe izao fa hiverina ho sokafana indray ny orinasa ka mahatonga ny tompon-tanana tsy manaiky ary manohitra ny hisokafan’izany amin’izao fotoana izao. Tsy manaiky ny fisokafan’io ny FIMA satria efa manana maodely ratsy amin’io fitrandrahana vaventy na “grande mine” io isika eto Madagasikara. Inona no tena tombontsoa entin’Ambatovy ho an’ny firenena? Fampanantenana tamin’izany fotoana hoe ho foana ny kere rehefa misokatra ny QMM nefa fantantsika tsara fa manomboka eo amin’ny distrikan’Amboasaritra, faritra Anosy, izao ny kere. Hitantsika farany teo koa fa maty hatramin’ny hazan-dranomasina. Ny olona lasa azon’aretina hafahafa. Laharana faha 4 amin’ny hatsarana sy hadiry maneran-tany io fasimainty kasain’ny Base Toliara trandrahana io. Ambony be koa ny tahana oranioma ka risika be noho izany ny mety hiparitahan’ny taratrana “radioactif” na singa miteraka tsy fahasalamana ho an’ny mponina. Misy fomba hafa azo hitondrana fampandrosoana amin’iny faritra iny tsy mamotika ireo mponina, ohatra, toy ny hoe fantantsika fa ny masikoro dia mivelona amin’ny fiompiana sy fambolena ka izay no tokony tohanan’ny fitondram-panjakana, hoy hatrany ny FIMA.
J. Mirija Legende: Elia Rabevahiny
 

Tia Tanindrazana

Samia mijoro ho an'i Gasikara.